En ondi se jan quedau aquellus tiempus,
aquellus tiempus del pasau,
el burru capon y la cabra mocha,
el sachu y la cesta que me regalalun,
los juegus de aquellus dias,
y la niñez que se me ja escurriu entri la manus.
En ondi ja quedau la escuela,
los chaguarzus , la jaras y los regatus,
el olor a tierra moja, a tomillu y lavanda,
lo olivus, los ciruelus y los cerezus,
y las nochis con mieo al hombri del sacu.
En ondi se jan quedau los consejus de mi abuela,
el sobrau de la casa donde buscamos trastus viejus,
la chacina corga de las puntas de la vigas,
el fuegu con el pote y el agua pa lavarnos,
y los domingus de misa, y las señoras con rosario.
En ondi jan quedau las leyendas,
los cuentus que se contaban al lau de la lumbri,
los juegus del agua, el gua, el burru y el incarroma,
la risa a carcaja de los niñus en las callis,
y aquel olor de leña de la tahona.
En ondi se jan quedau aquellus tiempus,
aquellu tiempus del pasau,
en el ayer siendu para siempri eternus,
en mi memoria, mi nostargia y en mi piel,
y en cada uno de los momentus que recuerdu,
grabaus a fuegu lentu en mi sien.
No hay comentarios:
Publicar un comentario